குழந்தை இரண்டு வயசாகியும் பேசலன்னா காரணம் என்னவா இருக்கும்? என்ன செய்யணும்?

குழந்தைகள் ஒரு வயதுக்கு முன்பே வா, போ, தா என்று ஒரு வார்த்தையை பேசுவார்கள். சில குழந்தைகள் எதுவுமே பேசாமல் அமைதியாக இருப்பார்கள். இதற்கு என்ன காரணம் என்று தெரிந்துகொள்வோம்.

பொதுவாக குழந்தைகள் மூன்றாம் மாதம் முதலே அம்மாவின் வாய் அசைவை பார்ப்பார்கள். குழந்தையிடம் பேச தொடங்கும் போது குழந்தையின் வாயிலிருந்து உமிழ்நீர் சுரந்து ஜொள் விடுதல் உண்டாகும். இதை பார்த்தாலே குழந்தை வேகமாக பேசதொடங்கும் என்று சொல்வார்கள்.

அதற்கேற்ப குழந்தையும் ங்,ஞ, த் என்று சத்தம் எழுப்பும். அம்மாக்கள் குரல் எங்கிருந்தாலும் சட்டென்று திரும்பி பார்க்கும். இதை கொண்டு குழந்தையின் காது நன்றாக கேட்பதையும் உறுதி செய்யமுடியும். சில குழந்தைகள் வளர்ச்சி அடைந்தாலும் பேசும் திறன் மட்டும் குறைவாக இருக்கும். தாமதமாகும் பேச்சுத்திறனுக்கு என்ன காரணம் எப்படி தவிர்ப்பது என்று பார்க்கலாம்.

குழந்தை ஒரு வயதுக்குள் தா, தா, ம், ம் என்று பேசுவதோடு ஒரு சில வார்த்தைகளை புரிந்துகொண்டு திரும்பி ஒற்றை எழுத்தில் பேசவும் தொடங்கும். பிறகு படிப்படியாக இரண்டு வார்த்தைகள், ஒரு சொற்றொடர் என்று பேசவும் தொடங்கும். ஆனால் இவை எதுவுமே இல்லாமல் குழந்தை மற்றவர்களது பேச்சை மட்டும் உற்றுகேட்டு பதில் அளிக்கவோ அல்லது அதற்கான முயற்சி செய்யவோ இல்லாமல் இருந்தால் அது மொழி தாமதம் என்று சொல்லலாம்.

குழந்தைகள் உரிய வயதில் உரிய வளர்ச்சியில் அடைய வேண்டிய அத்தனை விஷயங்களையும் சீராக பெற்றிருக்க வேண்டும். அதில் ஒன்று உரியவயதில் பேச்சு திறன் கொண்டிருப்பது. குழந்தைகள் பேசுவதில் சிரமத்தை சந்தித்தால் சமயங்களில் அவர்களுக்கு காது கேட்பதில் குறைபாடு, பேச்சு திறன் அறிவாற்றலில் குறைபாடு இருக்கவும் வாய்ப்புண்டு. இதற்கான அறிகுறிகள் மற்றும் காரணங்கள் சிகிச்சை முறைகள் குறித்து பார்க்கலாம்.

​குழந்தைக்கு பேச்சுத்திறன் குறைபாடு

குழந்தைக்கு பேச்சுதிறன் குறைபாடு என்பதை இரண்டாக பிரிக்கலாம். ஒன்று உங்கள் பேச்சு புரிந்துகொள்ளாததால் அவர்களால் உடனடியாக பதில் அளிக்க முடியாமல் போகலாம். அல்லது அவர்கள் பதில் அளிப்பது சிரமமாக இருக்கலாம். அதனால் மொழி பற்றாக்குறையா அல்லது அவர்கள் பதில் அளிப்பது அதாவது பேசும் திறன் பற்றாக்குறையா என்பதை கவனியுங்கள். பெரும்பாலும் பேசும் திறன் தான் குழந்தைக்கு குறைபாடாக இருக்கும்.

இதற்கான அறிகுறிகள்

ஒரு வருடம் கடந்தும் அவர்கள் மெளனமாகவே இருந்தால் சைகையால் மட்டுமே ந்ர்ஹ பொருளையும் கேட்டால் அது பேச்சுதிறன் குறைபாடாக இருக்கலாம்.

பிறகு 2 வருடங்களை கடந்தும் ஒரு வார்த்தை அல்லது அதையும் பேசாமல் வாயை அசைத்து உடனே அடங்கிவிடுவதும் கூட தாமதமான பேச்சுத்திறன் குறைபாடாகத்தான் இருக்கும்.

குழந்தை 3 வயதை நெருங்குகிறது ஆனாலும் ஒரு வார்த்தையை சேர்த்து பேசவில்லை. பேசுவதில் சிரமம், உச்சரிப்பிலும் மிக மோசம் போன்றவற்றை கண்டால் அவர்கள் வளரும் போது வார்த்தைகளை சேர்த்து கோர்வையாக்கி பேச அதிகம் திணறுவார்கள்.

காரணங்கள்


குழந்தைக்கு கேட்கும் திறனில் குறைபாடு இருக்கலாம். இதை குழந்தையின் 3 அல்லது 4 ஆம் மாதத்திலேயே கண்டறிந்துவிட முடியும். ஒருவேளை இதை கவனிக்க தவறினால் குழந்தை வளர வளர பேசுவதை கேட்க முடியாமல் அவர்கள் பேசுவது சிரமமாக இருக்கலாம்.

ஆட்டிஸம் பாதித்த குழந்தைக்கும் இந்த குறைபாடு நேரலாம். இதனால் இவர்களது உடல் தகவல் தொடர்புகளை பாதிக்கிறது. உளவியல் ரீதியாகவும் இந்த குறைபாடு நேரலாம்.இது வெகு அரிதானது என்பதால் குழந்தை பேசாவிட்டால் இதுதான் காரணம் என்று பயந்துவிட வேண்டாம்.

கற்றல் குறைபாடுகள் காரணமாக இருக்கலாம். குழந்தைகள் வளர்ந்த பிறகு தான் கற்றல் குறைபாடு நேரிட வாய்ப்புண்டு என்று சொல்லலாம். அறிவுசார்ந்த குறைபாடுகள் என்றும் இதை சொல்வதுண்டு.

குழந்தையின் மூளை வளர்ச்சிக்கு போதுமான கொழுப்புச்சத்து இல்லையென்றாலும் இந்த பிரச்சனை வரக்கூடும். குழந்தையின் மூளை வளர்ச்சி நன்றாக இருந்தாலும் அதை தூண்டி குழந்தையை பேச வைக்கும் பொறுப்பு குழந்தையின் குடும்பத்திடமே உண்டு.

வெகு அரிதாக குழந்தையின் தொண்டையில் அழற்சி, நாக்கு தொடர்பான நரம்புகளில் கோழைக்கட்டுதல், நரம்பு திசுக்களின் வளர்ச்சி குறைவு போன்ற பிரச்சனைகள் இருந்தாலும் குழந்தையின் நாக்கு புரண்டு பேச்சு தாமதப்படும்.

​யாருக்கு பாதிப்பு அதிகம்


நமது முன்னோர்கள் பேச்சு வழக்கில் ஆண் குழந்தைகள் சீக்கிரம் பேசமாட்டார்கள் என்று சொல்வார்கள். உண்மை தான் பெண் குழந்தைகளை காட்டிலும் ஆண் குழந்தைகள் தான் பேச்சு திறனில் பாதிக்கப்படுவதற்கு அதிக வாய்ப்பு உண்டு.

குறைபிரசவத்தில் பிறக்கும் குழந்தைகள், குடும்பத்தில் யாரேனும் திக்கு வாயாக பேசும் வழக்கத்தைக் கொண்டிருந்தால் அவர்கள் தாமதமாக பேச வாய்ப்புண்டு.

​என்ன செய்யலாம்


குழந்தை இரண்டு வயதுக்கு பிறகும் பேசவில்லை என்றால் தாமதிக்காமல் குழந்தை நல மருத்துவரை அணுக வேண்டும். அவர் குழந்தையை பரிசோதித்து செவித்திறன், மூளையின் செயல்பாடு பரிசோதித்து குறைபாடு இருந்தால் அதற்கு சிகிச்சை அளிப்பார்.

மாறாக அவை சிறப்பாக இருக்கும் பட்சத்தில் பேச்சு மொழி நிபுணரிடம் ஆலோசனை பெற பரிந்துரைப்பார். அவர்கள் குழந்தையின் பேச்சுதிறன் குறைபாடா அல்லது புரிந்து கொள்ளுதலில் குறைபாடா என்பதை கண்டறிந்து அதற்கான சிகிச்சை அளிப்பார்கள்.

​சீக்கிரம் பேச்சு வளர


குழந்தைக்கு தாமதமான பேச்சுதிறன் இருப்பதாக உணர்ந்தால் பெற்றோர்கள் குழந்தையின் அருகில் அமர்ந்து பேச்சு கொடுக்க வேண்டும். குழந்தைக்கான புத்தகங்களை வைத்துகொண்டு குழந்தைக்கு அந்த வார்த்தைகளை கற்றுத்தர வேண்டும்.

குழந்தைக்கு உணவு பிசையும் போது அந்த உணவின் பெயரை சொல்லிகொண்டே இருக்கவேண்டும். மம்மு சாப்பிடு, தண்ணி குடி, உச்சாபோ என்று சொல்ல சொல்ல குழந்தை தனக்கு வேண்டியதை திருப்பி கேட்கும். இதை குழந்தையின் ஆறாம் மாதம் முதலே செய்ய தொடங்க வேண்டும். வீட்டில் பெரியவர்கள் இருந்தால் கதை சொல்ல வைக்கலாம்.

குழந்தை தனியாக இருக்கும் நேரத்தில் குழந்தை பாடல்களை போட்டு கேட்க விடலாம். பார்க்க விடலாம். குடும்பத்தில் எல்லொரும் அமர்ந்து குழந்தையை சுற்றி பேச வைக்கலாம். இதையெல்லாம் செய்துவந்தாலே குழந்தை வேகமாக பேச ஆரம்பிக்கும். குழந்தை வளரும் போது மட்டுமல்ல வளர்ந்த குழந்தையை பேச வைக்கவும் இதை தவிர்க்காமல் செய்தால் சிகிச்சையோடு குழந்தை பேசவும் தொடங்கும்.

குழந்தைகள் பேச்சு வரவில்லை என்றால் உடனே ஏதோ கோளாறு என்று நினைத்து பயப்பட வேண்டாம். சில பெற்றோர்கள் குழந்தை மழலையில் பேசினால் கூட பேச்சு தெளிவில்லை என்று நினைத்து பயந்துவிடுவார்கள். ஆனால் இது சாதாரணமானது தான். அதே போன்று உடல் ஆரோக்கியமாக இருந்தும் குழந்தை தாமதமாக பேசலாம். குறைபாடு இருந்தாலும் ஆரம்பத்தில் பார்ப்பதன் மூலம் சிகிச்சை மூலம் குழந்தையை விரைவாக பேசவும் வைக்கமுடியும்.